Bændur og búalið

Það virðist vera heilmikill búskapur víða í Skotlandi en hvarvetna má sjá blómlegar sveitir með snotrum híbýlum og makindalegum búfénaði.

Aberdeen er svolítið eins og kaupstaðirnir úti á landi heima.  Auk þess að vera sjávarpláss þá koma bændur hingað og gera innkaup. Búðirnar á aðalverslunargötunni eru því með ýmsar nauðsynjavörur, sem þættu ekki smart á Laugaveginum. Í stað þess að horfa á Gucci og Prada í búðargluggunum þá eru ræstivörur mjög áberandi, efnisstrangar og búsáhöld.

En bændur fara ekki bara til Aberdeen til að skipta út skepnum fyrir tebolla og tau. Um daginn fór einn miðaldra hænsnabóndi í bæinn, það er að segja, til Glasgow. Hann var þó svo óheppinn að velta vagninum á leiðinni, með hænsnunum, og hlupu þrjú þúsund hænur um aðalþjóðveg Skotlands. Umferðin tafðist í átta  klukkustundir.

Ég held að ég kvarti ekki yfir einni og einni rollu á íslenskum þjóðvegum framar. 

Athugasemdir

[Guðrún Helgadóttir, 18.10.2007 kl. 10:51]

ég var einmitt stödd í Englandi þegar þetta gerðist og heyrði bráðskemmtilega umfjöllun í útvarpi um þetta í rauninni óskemmtilega atvik. Það hafði m.a. tafið aðgerðir við að ná hænunum að verklagsreglur um mannúðlega hæsnasmölun á hraðbrautum hafa ekki verið settar ;-)

[Regína (IP-tala skráð) 18.10.2007 kl. 17:34]

Heima hefði Stefán bara mætt og gert þetta sjálfur!